لبنان ته د څوارلسم پاپ سفر؛د سل زره کسانو په دعایئه مراسموکې ئې ګډون
ایکنانیوز د رویټرز له قوله راپور راکړی، څوارلسم پاپ لېو خپل لومړی بهرنی سفر پرون ناوخته د لسګونو زرو لبنانیانو په شتون کې په دعا کولو سره پای ته ورساوه.
په دې سفر کې هغه د مینځني ختیځ د سولې غوښتنه وکړه او خبرداری ئې ورکړ چې د نړۍ خونړیو جګړو د بشریت راتلونکی له خطرو سره مخ کړی دی.
پاپ لېو، چې لومړی امریکایي پاپ دی، د بیروت په بندر کې د ۲۰۲۰ کال د کیمیاوي چاودنې په ځای کې دعا وکړه، او له خپل لوری ئې د بیروت په ماسپښین کې د رم پر لور د روانېدو نه مخکې د دې ښار په ساحل کې د کاتولیکانو د عشای رباني مراسم مشري وکړه؛ وئيل کیږي چې کابو یو لک کسانو پکې ګډون کړی دی.
پاپ چې وائي د سولې په یو مأموریت کې ئې سفر کړی ، د لبنان له مشرانو غوښتي چې د تېر کال د اسرائیلو او حزبالله ترمنځ د ویجاړوونکې جګړې او د اسراییلو د پرلهپسې بریدونو وروسته د سولې هڅې ونه دروي.
پاب لېؤ د دوشنبې په ورځ د لبنان له بېلابېلو مذهبي ډلو له مشرانو سره وکتل او له هغوی یې وغوښتل چې د کلونو شخړو او سیاسي ـ اقتصادي بحرانونو وروسته، چې د مهاجرت پراخه څپه ئې رامنځته کړې، د هېواد د رغونې لپاره سره یو موټی شي.
هغه له مسیحي، سني، شیعه او درزي رهبرانو سره خبرې وکړې څو وښئي چې د بېلابېلو دودونو خلک کولای شي یو ځای ژوند وکړي او د درناوي او خبرو اترو پر بنسټ یو متحد هېواد جوړ کړي.
د لبنان د عالي اسلامي شيعه شورا مرستیال، شیخ الخطیب، پرون د بیروت په بینادیاني غونډه کې چې پاپ هم پکې ګډون کړی و، د پاپ سفر «د هیلې او یووالي فرصت» وباله او وې ویل: «موږ ستاسې دریځونه په دې سختو شپو ورځو کې چې زموږ هېواد لبنان ورسره مخ دی، د درناوي وړ بولو. هیله لرو چې دا سفر ملي یووالي پیاوړی کړي او د اسراییلي تېریو له امله رامنځته شویو دردونو په کمېدو کې مرسته وکړي.»
هغه ټینګار وکړ چې د شیعه مسلمانانو روحاني فرهنګ «د انساني ورورولۍ او د اسلام د ښوونو» پر بنسټ ولاړ دی او د دینونو د پیروانو اړیکې باید په خبرو اترو، همکارۍ او ګډ ژوند ولاړې وي.
https://iqna.ir/fa/news/4320397
